“Nuk do ta besoja po të mos e kisha parë”, kështu shkruan Artan Shkreli i cili është Këshilltari për Trashëgiminë në Kryeministri. Ai është habitur kur ka mësuar se në Kurvelesh ka ekzistuar një vend sakral pagan, ku njerëzit nuk besonin në fe, por në lisa.
Shënimi i plotë i Shkrelit në Facebook
“O Zot, po të mos e kisha parë nuk do ta besoja!
Një vend sakral PAGAN funksional ndodhet sot në mes të Shqipërisë (Kurvelesh), në njërën nga çukat e gjelbëruara, mbi kanionin e madh të Nivicës. është e pabesueshme kjo rrudhje tremijëvjeçare e kohës që të shpie drejt e në epokën kur Iliro-Epirotët ishin PANTEISTE dhe perëndite ishin rrufé, male ose ujra.
Asnjë gjurmë tempulli të krishterë ose mysliman në atë çukë, por vetëm një shesh me diametër mbi 20 m valluar me pemë shekullore dhe një patalog 5-6 m rrethuar me mur guri ku flijimi bëhet ende në nder të LISAVE, të cilëve njerëzia u drejtohet me lutje.
Nga pemët e shqyera e të djegura, duket se kodra thith sasi mbresuese vetëtimash.
Vendi, një lisnajë e bukur, quhet “TE LISAT”.”
